Friday, December 11, 2009

When You Go Farin, Pack Yuh Granny into Yuh Suitcase

Pack it like you loading truck!!

For my non-Caribbean readers, just take your time and read aloud... usually, the word is as it sounds... :)

I was feeling a lickle homesick... and mi did put up a lickle piece of saltfish for such a time as this. So what me do? Mi grab the dutchie, hot up some oil, rub up some flour, grab nedda pot, bwile di saltfish, cut up some onion, garlic, skellion, tomatis, and cook dem up, pick up the saltfish and dash it in, stur it up, and add some nice fresh crunchy cabbage, knead mi dough, roll mi dumpling, put dem inna di hat ile, and tun dem when dem golden and cripsy pon si outside, and done cook, dish out the food.... and wait.

"MMMMMMMMMMMNNNN," hubby start moan. Me start moan likkle bit after.

All who did feel like dem too nice to with travel with saltfish and dutchpot (me) dash way dem dere false pride as soon as you realise say some tings just dont cook the same way into farin pot. And yes Dutch Ovens may be bought a farin, but I swear, the food taste sweeter if is a hand me down dutchie from a family member who asways cook up some nice soul food and mek yuh hide and lick yuh finger.

The other night me mek some sorrel tea and when Hubby taste it, him say all this want is likkle rum fi be real sorrel. That's right.. mi come with pimento too!

Missis, you can tek di Jamaican out of Jamaica but you cyaan tek di Jamaican outa she.

Miss Modda from Stewarton Mocho, (mi maternal granny) used to make mi fry dumpling and cabbage and saltfish fi breakfast ... and this morning... I went right back to the 6 year old girl whose eyes get wide with glee when she see seh grandma cooking just for me!!!! All mi need now is the fresh peppermint tea from di bush outside the kitchen and the nice sweet Mocho air. Wha go done? Rain a fall inna Dubai!


Copyright 2009 TwentySomething+ Monologue. Powered by Blogger Blogger Templates create by Deluxe Templates. WP by Masterplan